Isabel Rodríguez trasladará al Gobierno las necesidades de personal en el sector de la madera en la provincia de Lugo
20/06/2022
A subdelegada reuniuse hoxe coa asociación Lugo Madeira que quere paliar a falta de persoal especializado contratando traballadores estranxeiros
A subdelegada do Goberno, Isabel Rodríguez, reuniuse hoxe con representantes do sector da madeira de Lugo que non atopan na provincia persoal suficiente para cubrir todos os postos de traballo. Na reunión que mantivo co presidente de Lugo Madeira, Daniel Díaz Ramos, e con outros membros da dirección da asociación de primeira transformación da madeira da provincia, a subdelegada comprometeuse a trasladar ao Goberno as súas propostas para poder cubrir as prazas vacantes con persoal estranxeiro.
Isabel Rodríguez explicoulles que a normativa actual permítelles facer contratos estables a traballadores de países como Chile ou Perú, que asinaron un convenio para ese efecto con España.
A provincia de Lugo ocupa un lugar destacado no sector da madeira. O 47% das empresas galegas de primeira transformación de madeira son lucenses. En Galicia córtanse ao ano 10 millóns de metros cúbicos de madeira, cifra que supón o 60% da madeira que se corta anualmente en España. Segundo a asociación Lugo Madeira, o sector ten déficit de traballadores forestais nas especialidades de *motoserrista e operario de maquinaria forestal pesada e estaría en condicións de incorporar de maneira inmediata a 70-80 empregados.